सांगलीतील विश्रामबाग रेल्वे मालमत्ता कारवाईवरून मनसे आक्रमक

 

सांगली : विश्रामबाग परिसरातील आर सिटी मॉलजवळील रेल्वे प्रशासनाच्या मालकीच्या जागेवरील कारवाई प्रकरणी मनसे आक्रमक झाली आहे. सांगली मिरज कुपवाड महापालिकेकडून “अतिक्रमण” म्हणून करण्यात आलेल्या कारवाईत रेल्वेची जुनी इमारत व अनेक वर्षांपासून व्यवसाय करणाऱ्या खोकेधारकांचे बांधकाम पाडण्यात आले.

दरम्यान, रेल्वे अधिकारी कंपाऊंड उभारण्यासाठी घटनास्थळी आल्यानंतर मनसे जिल्हाध्यक्ष तानाजीराव सावंत, खोकेधारक संघटना व हमाल संघटनेच्या पदाधिकाऱ्यांनी तीव्र विरोध दर्शविला. जर ही जागा रेल्वेची असेल, तर महापालिकेने रेल्वेची लेखी परवानगी घेतली होती का, असा सवाल उपस्थित करण्यात आला. परवानगी नसेल तर संबंधित अधिकाऱ्यांवर कारवाई का झाली नाही, असा प्रश्नही उपस्थित झाला.

 तानाजीराव सावंत यांनी संबंधित आयुक्त व कारवाईतील अधिकाऱ्यांवर फौजदारी गुन्हे दाखल करून वापरलेली यंत्रसामग्री व वाहने जप्त करण्याची मागणी केली. रेल्वे प्रशासनाने लवकरच संयुक्त बैठक घेऊन निर्णय घेण्याचे आश्वासन दिले आहे.